شبابيك على الحياة

من اجل رؤية ما يدور حولنا , لننظر من الشبابيك

ناوى على ايه

ياترى نفسك فى ايه
ياترى لما بتدعى بتفتكر عاوز تدعى فى ايه
ليه ماتجهزش لسة باللى عاوز تعمله فى رمضان يعنى
مثلا
, عاوز اختم القرأن مرة
" قال صلى الله عليه وسلم( الصيام والقرآن يشفعان للعبد يوم القيامة يقول الصيام: أي رب منعته الطعام والشهوة فشفعني فيه ، ويقول القرآن: منعته النوم بالليل فشفعني فيه .قال: فيُشفعان )رواه احمد والطبراني وصححه الألباني
وعاوز اصلى النوافل: – ده اوكازيون , النافلة فى رمضان = فرض فى غير رمضان وياعينى بقى لو صليت كل الفروض فى الجامع ( هوباااه , ده انا كده ابقى جبت الخلاصة)ولا ايه
ويا سيدى لو قعدت يوم بعد الفجر لغاية الشروق تقرأ قرأن و تذكر الله " من صلى الفجر فى
جماعة ثم جلس يذكر الله حتى تطل الشمس فصلى ركعتين كتبت له حجة وعمرة تامة تامة تامة
لا انما ايه بقى لو صليت التراويح فى جماعة
قال صلى الله عليه وسلم( من قام رمضان إيمانا واحتسابا غفر له ماتقدم من ذنبه ) متفق عليه.•وقال
( من قام مع الإمام حتى ينصرف كُتب له قيام ليله) رواه أهل السنن وحسنه الترمذي
طب لو اتصدقنا شوية ( اهو حبة من المصروف – مااحنا موفرين الاكل برة و قاعدين فى البيت بدل
مانصرفهم على القهوة بالليل نطلع كام يوم صدقة فقد كان رسول الله صلى الله عليه وسلم أجود الناس وكان اجود مايكون في رمضان حين يلقاه جبريل يلقاه كل ليلة فيدارسه القرآن فرسول الله صلى الله عليه وسلم حين يلقاه جبريل أجود بالخير من الريح المرسلة.) متفق عليه
طبعا لما نيجى نفطر ندعى لنفسنا " للصائم عند فطره دعوة لا ترد " طب ماتيجى ندعى بالمغفرة لكل المسلمين ( ياااااااااه ده انت الملائكة هاتدعيلك بعددهم , شوف العز اللى هتبقى فيه لأ وايه دى الملايكة اللى هاتدعيلك ياعم
قال صلى الله عليه وسلم: (إن لله تبارك وتعالى عتقاء في كل يوم وليلة – يعني في رمضان –وإن لكل مسلم في كل يوم وليلة دعوةً مستجابة ) رواه البزار وقال اللباني:صحيح لغيره.•وقال ( ثلاث دعوات مستجابات : دعوة الصائم ودعوة المظلوم ودعوة المسافر ) رواه البيهقي وصححه الألباني

طب انا بسمع عن الاعتكاف سمعت عنه
كان النبي صلى الله عليه وسلم يعتكف العشر الأواخر من رمضان حتى توفاه الله ) ..متفق عليه فلما كان العام الذي قبض فيه اعتكف عشرين يوما
ماجربتش قبل كده , ولا انت زى حالاتى مش فاضى بتصحى الصبح تجرى على الكلية و مش هاينفع تعتكف فى الجامع
طب ايه رأيك ليها حل
كل ماتيجى تدخل الجامع حتى لو داخل لصلاة قول " نويت الاعتكاف فى المسجد مادمت فيه " حتى لو قعدت 5 دقايق اهو اتكتبت معتكف وابسط يا عم
طب نشوف كده السحور
, انا عارف انك بتكون نايم ومنعوس و مش قادر تصحى , وعارف انك بتقدر تصوم من غير ماتتسحر بس استنى بس , بص كده
قال النبي صلى الله عليه وسلم: السحور أكلة بركة فلا تدعوه ولو أن يجرع أحدكم جرعة من ماء فإن اله وملائكته يصلون على المتسحرين ) رواه أحمد وحسنه الألباني
طب نفسك فى أيه تانى ؟؟؟ ماتجهز كده اللى نفسك فيه , احنا لسة ماعداش الا يومين , الحق قبل رمضان مايخلص
انا مش بقولك اعمل المستحيل - مع انه رمضان ويستاهل - بس اهو ادينا ينعمل حاجة احسن مانطلع من مولد بلا حمص
قال النبي صلى الله عليه وسلم: ( رغم أنف رجل دخل عليه رمضان ثم انسلخ قبل أن يغفر له )رواه الترمذي وصححه الألباني
وفى الاخر خد بالك من حاجة وقال صلى الله عليه وسلم ( إذا جاء رمضان فتحت أبواب الجنة وغلقت أبواب النار وصفدت الشياطين ) متفق عليه
يعنى الشيطان اللى معاك محبوس ياحلو , يعنى انت شيطان نفسك
وكل سنة وانتم طيبين

يوم

احداث يوم
اصحى يا نايم وحد الدايم

يلا يا ولاد اصحوا علشان تتسحرو , اصحى يا منى اصحى يا تامر
صحو اخوكم التنبل اللى نايم ده
على على على على على اصحى يا على على على
يووووووووووووووو ايوة ايوة يا سى تامر , صحيت اهة

كل سنة وانتى طيبة يا ماما كل سنة وانت طيب يا بابا , كل سنة وانتم طيبين يا وحوش
ابيه على شفتى فانوسى , احلا ولا فانوس منى
طبعا فانوسى احلا
انتو الاتنين فوانيسكم حلوة

على السحور , الاب والام و الاطفال الاتنين , طبعا على نايم على نفسه

بعد السحور
ماما انا هاادخل اريح حبة وابقى صحينى على الفجر
بس ياابنى انت هاتغلبنى ومش هاتصحى
معلش ياماما , ابقى رشى عليا مية

قطع

حبيبى قرب بص وبص بص
..
رجب حوش صاحبك عنى

ولة يا رجب , ماتلم صاحبك امال خلى البت تمشى براحتها
صباح الفل يا عم تامر
صباح القشطة يا كريم
خدلك نفس من السيجارة دى قبل مانصوم
قشطـــــــــــة
نوع ايه الماركة دى
ده اسمه و صوم وعيش
فعلا هانعيش
يلا نروح يا شباب علشان الحق انام قبل الفجر علشان محدش يقولى صلى

قطع

الله اكبر
لا ماتستعجلوش ده الضهر لسة
مشهد فى بيت مصرى عادى
الاب , الابن ( على او غير على ) نازلين يصلو
بعد الصلاة
فيه ايه فى التلفزيون يا ماما
اكيد المسلسل الدينى ياابنى , ماهو دايما كده يجيبوه اخر الليل و لما الناس تشتكى يعيدوه الضهر والناس فى الشغل
قطع

اصحى ياتامر اصحى
ايه هوة المغرب ادن
لا لسة , بس مشهاتقوم تصلى الضهر ,
هااقوم اهوه , بس ابقو صحونى على المغرب

قطع
قرب المغرب
التلفزيون يعرض حديث الشعراوى ( اللى شالوه من يوم الجمعة ) على الله مايشيلوهوش من رمضان السنة دى

على يقرأ فى المصحف , الاب يشاهد الشيخ الشعراوى
الام والاخت بيحضرو الفطار

مدفع الافطار
اضرب
بوووووووووووووم
فين التمر يا ماما , فين العصير
كل سنة وانتم طيبين عدى يوم
ماما عاوزة اتفرج على بكار
لا يا ماما عاوز اتفرج على المغامرين

كلو بالرحة يا ولاد , انتو مفاجيع كده ليه

يلا ياولاد علشان نلحق التراويح

قطع

الو يا بوب , ايه فطرت يا مان
ايوة ياعم تامر الوحد تعب قوى النهاردة , تصور يصحونى قبل الفطار ب 10 دقايق ال ايه علشان اصلى واقرا قرأن
معلش يا مان , دول برضه مصحينى قبل الفطار بنص ساعة بحالها
يلا ولا يهمك , نظامك ايه النهاردة
عاوزينى اصلى التراويح
لا ياعم انا هااطلع على الخيمة اللى كنا فيها مبارح
طب وهات المعلوم معاك , وانا هاحصلك اهوه
قشطة علية
قطع

سيارتان فى الشوارع فى اتجاه احد الكافيهات
مجموعة اشخاص فى اتجاه المسجد

صلاة القيام اثابكم الله

الله اكبر

زمان


زمان
كان يا ما كان , كان الزمان وكان

دوم دوم
اصحى يانايم وحد الدايم ..... رمضان كريم
اصحو يا ولاد الحقو المسحراتى فى الشارع اهوه
وله يا احمد بت يا منى , يلا نلحق المسحراتى
ماتتأخروش لفو وراه شوية على مااحضر لكم السحور

وحوى يا وحوى
وكمان وحوى


زمان
بس مش زمان قوى
دوم دوم
اصحى يا نايم وحد الدايم

اصحى يا واد انت واخوك الحقو المسحراتى
ماما ممكن نقف فى البلكونة نشوف المسحراتى
اقفو شوفوه على مااحط السحور

زمان
بس مش زمان , بس هنغير المكان

اه اخاصمك اه ,
ميدو شوف مين اللى باعتلك رسالة
وبعدين غير النغمة دى احنا اول ليلة رمضان
...........
مين اللى باعت الرسالة يا ميدو
ده الواد اكسسوار بعتلى رسالة علشان هنروح نتسحر برة
فين يا ميدو
فى كافيه بس عامل بروجرام هايل هنسهر هناك للفجر , ده حتى هايجيبو مسحراتى يطبل
قشطة , انا جاى معاك ياد
رمضان كريم

لسة فاكر, ولا نسينا

لسة فاكر عم مينا
عم مينا بتاع زمان
المقدس اللي كان
بيفوت علينا بالأمان
جيبه مليان بالحلاوة والبلح
وعيونه مليا الكون حنان
عم مينــــــــــــــــــــــــا

عم مينا وشيخ أمين
الله عليهم لما كانوا بيضحكو على نكتة واحدة
مش مهم مين اللي يقولها , المهم النكتة حلوة
واللى أجمل و اللي أحلى ضحكة طالعة من روحين
شوف حروف الاسم حتى , مينا نفس حروف أمين


( فريق وسط البلد : عم مينا )

.


ايام وسنين بتعدى
بنقابل مواقف
ونشوف حاجات كتير
ونسمع حاجات اكتر
الطريق طويل
بنمر بمراحل ( فرح , حزن , اكتئاب , بهجة , ..... ) وغيرها
بس اهم حاجة اننا نتعلم
انا عن نفسى بحاول
ولسة بحاول
المهم نقدر
نحط نقطة , ونبتدى من اول السطر

محاكمة مرسى .... الاستئناف

اوراق فى اول الدفتر
مكتب أ/خليفة حمدى
المحامى بالاستئناف والنقض
الى السيد القاضى المبجل مستشار الاستئناف فى دائرة محكمة الانسانية مرفق الى سيادتكم اوراق قضية مرسى زناتى المدعى عليه من السيدة ليلى المصرية فى القضية اللتى شغلت الرأى العام البلوجاوى فى الفترة الماضية ومرفق ايضا اوراق المحاكمة التى تثبت ان السيد مرسى لم ينل حقه فى استدعاء شهود النفى , اذ ان كل القضية كانت شهود اثبات من طرف السيدة المدعية ولذلك ارجو من سيادتك الموافقة على استئناف الحكم الصادر بحق موكلى
محكمة الاستئناف
بعد الاطلاع على اوراق القضية , و طلب الاستئناف وحيثياته , يقبل استئناف القضية و يتم تحديد موعد الجلسة فى اقرب وقت ممكن
يعتمد
----------------
تنويه : بعض الحوارات الموجودة هنا مطروحة ايضا فى المحاكمة الاولى , وبعض التعليقات تم ادراجها من المناقشات والمواضيع الجارية على المدونات

-------------------------------
المكان : جميع المنازل المصرية
الزمان : الان , الامس , غدا
الحدث : محاكمة مرسى الزناتى ( الاستئناف)فى قضيةالمرفوعة عليه من ليلى
الناقل : جميع المحطات الاخبارية ( سى ان ان , يورو نيوز , ومراسلى وكالات الانباء )والصحف

الكاميرا تقترب الى التلفزيون ويتم نقل الصورة مباشرة

اعزائى المشاهدين فى كل..وعلى كل القنوات ننقل اليكم بث حي من قاعة المحكمة , لننقل احداث اعادة محاكمة مرسى زناتى ممثل عن افراد المجتمع من الذكور , والمرفوعوة عليه من السيدة ليلى ممثلة عن اناث المجتمع

الكاميرا تتحرك فى ارجاء قاعة المحكمة لتظهرها مقسومة الى نصفين السيدات فى نصف والرجال فى النصف المقابل
لقطات مقربة للافتات لافتة "كلنا ليلي"..."الى الامام " " نعم للحرية " "يسقط المجتمع الذكورى "
" تسقط ليلى " " نعم للانحلال " " كلنا مواطنون " "فينك يا سى السيد " ...

مرسى فى قفص الاتهام
محـــــــــــــــــــــــــــــــــــــــــــــــــــــــــــــكمة
الدفاع : سيدى القاضى حضرات المستشارين


اان هذة القضية للها تأثير هائل فى الرأى العام ,انها تعبر عن مشاعر المجتمع
لا اريد ان اطيل عليكم لكنه من الواجب اعطاء فرصة لرؤية وجة النظر الاخرى
مرسى : ايوة يا استاذ دول دخلو عليا زى مايكونو ناويين يقتلونى وماعرفتش ادافع عن نفسى
القاضى : اسكت يا مرسى ماتتكلمش من غير اذن
الدفاع : سيدى القاضى اسمح لى لنبدا بسماع ومناقشة الشهود
الشاهد الاول
شابة بالعشرينات: عارفين خطيبي بيكلمني ازاي: انا " ح اخدك" افسح.. و "رايي" هو اللي ح يمشي..و "كلامي" اوامر... و البلوزة دي متلبيسيهاش..و شعرك قصيه كذا...انا "دافع فيكي" دم قلبي....... هو اشتراني...امال لما يتقفل علينا باب واحد ح يبقي ايه النظام؟
مرسي : مش جايبلك شقة و شبكة و مهر...بالشئ الفلاني ..... يبقي دافع فيكي ولا لأ؟؟؟ اه منكم يا ستات وبعدين مش اهلك انتى هما اللى طلبو الكلام ده كله وقعدو يعجزوه لكن الواد ياولداه طفح الكوتة وسافر يشتغل فى الغربة ولا حاول يهرب لايطاليا علشان يجيب فلوس الحاجات اللى اهلك طالبينها , وبعدين ماهو يااما انتى بتتدلعى عليه , ولا علشان مرة حب يهزر بس طلع هزار رخم هاتمسكوهالو

سيدة محجبة (علي حجرها رضيع) :طب النبي اتلهي يا مرسي...امال انا المتجوزة.. و شايفة طلبات الافندي هو و عياله.. بس يتفتح باب المناقشة ما بيننا..ان شاء الله حتي في طبخة.لااااااااازم يفتي و يطلع هو الانصح وان انا اللي مابفهمش في حاجة و ان كلمته لا ممكن تنزل الارض ابدا..وهو لا بيفهم في البطيخ


مرسي: ماهو لو بحبة لطافة اكلتى عقله وحسستيه ان هو فعلا راجل البيت كان بططل يتكلم , مفيه ستات بتاكل بعقل اجوازها حلاوة وفى الاخر برضه بيمشو اللى هما عايزينه , يبقى مين غلطان اللى بيجى من الشغل تعبان وعاوز كلمة حلوة تريحة ولا اللى قاعدة فى البيت واول مايدخل جوزها تقله هات وهات وعاوزين ....

شابة فى العشرينات : طب تقول ايه يا عم مرسى فأن صحاب الشغل فى البلد بيفضلو توظيف الرجال على النساء , مش ده تمييز على اساس الجنس
مرسى : بصى ياانسة – شكلك كده انسة – اولا مش كل اصحاب العمل بيفضلو الرجالة , وعلى الاغلب ده بيرجع لطبيعة العمل , ماهو مش معقولة نشغل بنت فى ورشة حدادة ولا على مخرطة
وبعدين لو الشغل فيه تأخير لبليل او نبطشية ماينفعش بنت تقوم بيها

الشابة مقاطعة : مين اللى قال ماينفعش نشتغل بالليل
مرسى (محتجا ) : مش انا اللى قلت ولا التقاليد يا ستى بس لماانسة زيك تمشى فى شارع بالليل مليان عالم سكرانة ولا شارية ولا ضاربة حاجة يبقى ايه الحل ساعتها ؟؟ لما يكون المشى فى الشارع بالليل زى النهار ابقى اشتغلى براحتك , ماهو مش تحصل مصيبة وتوقعيها على صاحب الشغل علشان اداكى نبطشة بالليل

وبعدين قوليلى بقى مش ساعات كتير بتستخدمى حجة انك بنت علشان تهربى من شغلانة او سفرية انتى مش عاوزاها , لا هوة نظام اللى تغلبه العبه , لما تحبى ان صاحب الشغل ينسى انك انسة او بنت يبقى ماتستخدميش الكارت ده فى الوقت اللى انتى عاوزاه

سيدة فى الثلاثينات : طب بصى بقى يامرسى شوف اللى بيحصل فى المواصلات , زمان لما كانت تركب اتوبيس ست كبيرة او حتى صغيرة كانت تلاقى الشباب والرجالة كله قام علشان تقعد ولو قعدت جمبه كان يتاخر ومايحاولش يلمسها

مرسى : ومين اللى قال ان دى غلطة الراجل , دى غلطة تربية , زمان كنا بنتربا اننا يعلموننا أنه في المواصلات يجب أن نقف للنساء وللناس الكبيرة فى السن و نوسعلهم علشان يقعدوا – صحيح فيه ناس كانت فيه ناس بتعملها علشان تعاكس , بس كان برضه بااحترام - و لو وجدنا واحدة ست كاوتش عربيتها بايظ لازم ننزل و نقوم بالواجب و ماينفعش نزعق لواحدة ست أو نشوحلها بإيدينا عشان عيبد لوقتى ماعادش , مش الست بتقولك مساواة , فكل واحد يقول اشمعنى انا اللى اقوم ماانا جاى من الشغل تعبان , اشمعنى انا اللى افضل واقف ماتقف هيا
وانا معاكى انه فيه حاجات بتحصل من الرجالة فى المواصلات بتبقى قلة أدب

السيدة مقاطعة : طب ده مين اللى عمل كده
مرسى : والله ماهو اللى بيربى الامهات , يعلمو ولادهم ويربوهم

سيدة متزوجة : طب يامرسى تقول ايه عن الراجل اللى بيقعد فى البيت ومراته تعمله كل حاجة وهو عمال يدى اوامر بس
مرسى : انا معاكى انه مايصحش و ان الجواز مشاركة ومسئولية بين الاتنين بس ياترى الست دى مراعية انه راجع من الشغل تعبان وعاوز يستريح ولا عيا عاوزة تشغله وخلاص
السيدة : ماهى برضه رجعة من الشغل تعبانة
مرسى : والله الاولى بالست انها تقعد قى بيتها
السيدة : وتكاليف المعيشة
مرسى : اذا كانت بتشتغل علشان تساعد فى البيت يبقى معلش جوزها لازم يساعدها فى شغل البيت , ماهو زى مابيتشاركو فى المصارييف يتشاركو فى المسئولية , وبعدين حتى لو قاعدة فى البيت اهو برضه المفروض يخف عنها شوية
المحامى : سيدى القاضى ارغب فى استدعاء شاهد اضافى , ادخل يا حنفى
يدخل حنفى شاب فى اوائل العشرينات
حنفى: ايوة ياباشا
المحامى : انا مش هأسألك , اتكلم انت يا حنفى
حنفى (متوترا): انا مش هأتكلم كتير ياباشا , انا هااقول عن اللى امى يتعمله معانا , اخرها النهاردة اختى كانت عاوزة تشترى حاجة من محل على اول الشارع , قالتلى قوم روح اشترى ليا الطلبات دى , وماتنزلش ليه تشترى لنفسك , قامت امى رادة عليا وقالت يعنى قاعد تعمل ايه , ماتنزل اشترى لاختك اللى هيا عاوزاه
ومن ده كتير ياسعادة الباشا
المحامى ( مستفسرا ) : يعنى ايه يا حنفى
حنفى : يعنى انا حاسس ان امى بتحب اختى اكتر منى
المحامى : والحج والدك فين
حنفى : ابويا قاعد فى البيت وموافقها فى كل حاجة , اصل ماعلش يابيه امى هيا اللى بتمشى البيت وابويا بيوافقها
المحامى : يعنى ابوك ما بيعملش حاجة فى البيت
حنفى: ازاى يابيه , بس ابويا لازم ياخد رأى امى فى كل حاجة , وعلى الاغلب اللى بتشور بيه امى هوة اللى بيمشى
المحامى : والحاجة مبسوطة
حنفى : وتزعل ليه اوبيا مخليها ملكة زمانها , بيجبلها كل طلباتها
المحامى : شكرا ياحنفى, شكرا سيدى القاضى

القاضى : ترفع الجلسة للاستراحة

مشاهد خارح قاعة المحكمة

مجموعة رجال ... ايه الاخبار : مرسى فاقلهم المرادى وبيرد حلو

مجموعة سيدات ...ايه الاخبار : مرسى والمحامى بتاعه بيقولو نفس الكلام الخايب اللى بيتقال كل مرة

مسيرتان خارج المحكمة
عاشت ليلى رمز المرأة

يا مرسى يافتوة وريهم القوة

لقاء على قناة تلفزيونية
المذيعة فى حوار مع بواب عمارة
المذيعة : ايه رأيك فى مرسى
البواب : ده راجل خرع ازاى يسمح لواحدة انها تحطه فى القفص , دى لو كانت مراتى كنت قتلتها , او قليله عملتلها عاهة
المذيعة : ليه مفيش قانون فى البلد
البواب : ايه ياهانم , على رأى المثل اكسر للبنت ضلع يطلعلها 24
المذيعة موجهة كلامها لمرات البواب :انتى ايه رأيك بقى
مرات البواب : رأى هو يصح اقول حاجة بعد جوزى


قناة تلفزيونية اخرى
حوار مع سيدة
المذيعة : ايه رأيك فى المحاكمة
السيدة : دى مهزلة , كلنا عارفيين ان مرسى مفترى وان ليلى مظلومة
المذيعة : بس من حقه يدافع عن نفسه
السيدة : هيافع يقول ايه , نفس الكدب والكلام اللى بيقوله طول عمره


حوار اخر مع احد الرجال
المذيعة : ايه رأيك فى المحاكمة
الرجل مستهزأ: دى مهزلة , مساواة واخدو مساواة , راجعين يطالبو انه الواحد يقوم لهم من الكرسى , يااخى هأأأ-أو
يتدخل اخر فى الحوار : كرسى مسن يابيه دول عاويين يلبسو اللى هما عاوزينه ويسهرو برة البيت , عازينها مسخرة
رجل اخر : لا محدش قال كده , هما عاوزيين يكون لهم الحق يعملو زى الراجل مابيعمل , بس هايستخدمو الحق ده ولا لأ محدش قال


عودة الى داخل المحكمة
محـــــــــــــــــــــــــــــــــــكمة
القاضى يجلس على كرسيه
القاضى : الدفاع عنده كلام تانى ؟
المحامى :عندى شاهد اخير سيدى القاضى , ادخل يا احمد واتكلم على طول
الشاهد احمد : سيدى القاضى , انا مش هااقول ان مفيش مشكلة لا فيه بس انا هاتكلم عن نفسى انا طول عمرى حاسس ان أبويا بيحب اخواتي البنات اكتر مني مع انى الولد الوحيد يعنى مثلا قوم فز روح صور الورق ده لاختك . وأنا مالي. يعني عايزها تنزل تلف وتصور الورق وانت قاعد تنبل هنا ؟ اما صحيح معندكش دم ولا مثلا بعد الاكل لما يشخط فيا ويقولى اغسل االطبق بتاعك , ماهو ماما او اختى هاتغسله , وماتغسلوش انت ليه ناقص ايد ولا هو اكل ومرعى وقلة صنعة , ,غيرها كتير
انا ياسدى القاضى فى زى كتير , انا اللى بطالب بالمساواة دلوقتى , بطالب انه زى ماانا بقف فى طابور العييش فى الشمس هيا كمان تقف , بطالب انه زى ماانا بجرى ورا الاتوبيس والميكروباص هيا كمان تركب الاتوبيس , ومايدوهاش مصروف اكتر منى علشان تركب تاكسى ولما اقولهم ليه يقولولى علشان هيا بنت ومايصحش

بطالب انه لما يكون فيه فى تعيينات مايعينوهاش الاول فى الاماكن القريبة من البيت وفى محافظتها واتبعت انا اخر الدنيا علشان انا راجل عليا الاستحمال
بطالب ب....................... اقول ايه ولا ايه
اقول على الشحططة , لا البهدلة ولا انا على طول عليا الاستحمال علشان انا راجل وهيا ست
فيه كلام كتير قوى يا سيادة القاضى بس كفاية كده

القاضى : الدفاع عنده حاجة تانية
المحامى : لا يا سيدى القاضى شكرا
مرسى : بس انا عاوز اقول حاجة يا سيى القاضى
القاضى : قول يامرسى
مرسى : انا بتكلم بأسمى , على الاقل مش هااقول اسم رجالة كتير
انا عارف ان فيه ظلم على البنات , بس مش للدرجة اللى انتو قايلينها
يمكن احمد قال شوية من اللى بيحصل , وليلى قالت شوية , صحيح انه فيه حاجات مايصحش بس مين اللى قال اننا ملايكة
احنا بشر ,
علشان كده انا هاساعد مراتى فى شغل البيت , بس هيا كمان تراعى انى بتعب فى الشغل , وتاخد بالها من نفسها علشان ماابصش لحد تانى وتاخد بالها منى علشان افضل معاها
انا عارف انى لازم اتغير , بس لايمكن الكلام ده بين يوم وليلة , ولا يمكن بالصورة اللى بيقولو عليها دى
فى حاجات الراجل عاملها علشان حماية الست و لا لما عوزتها تخلص يبقى الراجل كخة علشان عملها
المساواة مش معناها مساواة فى كل حاجة , اكيد هيبقى فيه حاجات اكتر على طل طرف حبة , بس بالمشاركة المساواة هتتطبق


القاضى
رفعت الجلسة للمداولة
مشهد خارجى
حالة سكون تام فى انتظار الحكم

فى احد المنازل , زوج و زوجة ينظرو لبعض ويتكلمو عن المسئولية والمشاركة فى الحياة
الكاميرا تبعد عنهم تدريجيا ليدخلى فى الكادر طفل وطفلة كل منهم يحمل طبقه ويتجه به المطبخ ويقف على كرسى ويغسل طبقه

الكاميرا تتحرك لخارج المنزل ويدخل فى اكادر مبنى المحكمة وتجمهر الناس حوله فى انتظار الحكم

مراسلات

مكتب أ/خليفة حمدى
المحامى بالاستئناف والنقض
الى السيد القاضى المبجل مستشار الاستئناف فى دائرة محكمة الانسانية
مرفق الى سيادتكم اوراق قضية مرسى زناتى المدعى عليه من السيدة ليلى المصرية فى القضية اللتى شغلت الرأى العام البلوجاوى فى الفترة الماضية
ومرفق ايضا اوراق المحاكمة التى تثبت ان السيد مرسى لم ينل حقه فى استدعاء شهود النفى , اذ ان كل القضية كانت شهود اثبات من طرف السيدة المدعية
ولذلك ارجو من سيادتك الموافقة على استئناف الحكم الصادر بحق موكلى
محكمة الاستئناف
بعد الاطلاع على اوراق القضية , و طلب الاستئناف وحيثياته , يقبل استئناف القضية و يتم تحديد موعد الجلسة فى اقرب وقت ممكن
يعتمد

مش كلنا مرسى



مش كلنا مرسى

طبعا كلنا شفنا الحملة – لو التسمية صحيحة – اللى موجودة على المدونات النهاردة تحت اسم كلنا ليلى
انا فى الاول ماكنتش متخيل انها حملة او صرخة زى مابحب اسميها , اول ماشفتها كانت عند بطابيط
فكتبت رد عن الموضوع , وبعد كده لقيته عند ابيتاف , بنت مصرية , لست ادرى ,.... وغيرها
قلت انا مش هااقعد اكتب رد فى كل الاماكن دى , ففكرت انى اعمل موضوع اكتب فيه الردود بتاعتى – بعد تصيحي الغلطات الاملائية ان امكن
وفى نفس الوقت احاول اقول رأى عن الموضوع , بس لما قريت موضوع ابيتاف لقيت عنوان الرد بتاعى

عفوا مش كلنا مرسى , زى ماهو ليس كلكن ليلى

المجتمع المصرى خصوصا والعربى عموما مجتمع ذكورى قايم على ان الرجل هو مركز السطة , وهو اللى بايديه يدى الحقوق او يمنعها –زى رئيس الجمهورية كده- لانه قايم على الثقافة البدوية – اللى هية اساس الثقافة العربية عموما – فكان الرجل هو مصدر كل شىء-باعتباره من يحارب ويعمل
الكلام ده لما انتشر وبالذات فى مصر , فى الاول ماكنش فيه مشكلة لان الحياة الزراعية والريفية كانت تقريبا نفس الحاجة
بس نيجى لدلوقتى , الموضوع اتغير وماعادش الراجل هو كل حاجة
نبص دلوقتى هانلاقى عائلات كتيرة ماعدش فيها الكلام اللى اتقال ده , عاد فيه حرية اكتر للبنت , منع اكتر للولد- منع بالنسبة للحرية اللى كانت معاه
ومش معنى ان فيه حاجات غلط الولد بيعملها يبقى البنت كمان لازم تعملها , بالعكس لازم تتمنع عن الولد
مش معنى انه يساء استخدام الحرية يبقى الحرية وحشة , الشباب وبالذات الولاد بيستخدمو الحرية باسوأ طريقة ممكنة - شوف الموضوع بتاع بطابيط
طب ده الموجود , ايه الحل
الحل فى المشاكل دى عمره ماهيبقى بين يوم وليلة , بالعكس هايحتاج فترة طويلة
وبرضه عمره ماهيبقى بقرارا او قانون من فوق , لان ده تغيير فى عادات المجتمع , يبقى لام يبقى من قاعدة الهرم مننا احنا , الجيل اللى موجود دلوقتى – بالذلت البنات – قدر ياخد حقوق كتير – حق مكتسب يستحقه –
فالمفروض يحافظ على الحقوق دى ومايستغلهاش غلط ويحاول ياخد حقوق اكتر
وبكده ممكن نقول انه فى المستقبل القريب نقدر نوصل فعلا لمرحلة المسئولية والمساواة الفعلية
بس الاهم من اخد الحق , انك بعد ماتاخده تثبت انك تستحقه فعلا وتحافظ عليه
ومانستغلش الحرية بصورة غلط زى مابيحصل من الشباب و بالذات الولاد زى ماهو مكتوب فى الموضوع

-----------------------------------
وفى تفس الوقت , مش لازم نعمم الكلام ده , لانه بناءا على تجارب شخصية , مش كل البنات ليلى كذا مرة قدامى ببقى بحضر تدريبات او ندوات ويجى الكلام عن حقوق المرأة تلاقى اول المعترضين هما من السيدات و الأنسات, وانا وزمايلى بنحاول نناقشهم ونثبتلهم ان ده حقهم وهما ابدا و مقتنعين اننا بنحاول نفسد دماغهم وندخل افكار غربية علشان نفسد الناس
من فترة كنت فى تدريب لمجموعة من الطالبات وفى المناقشة فى وسط التدريب كانو كلهم مقتنعين انهم مش محتاجين حاجة , نسبة منهم كانت مش مقتنعة بالمواضيع اللى بنتكلم عنها , وكان ضمن التدريب استطلاع رأى للطالبات نتيجته ان نسبة معقولة منهم كانو بيفكرو فى انهم عاوزين يتجوزو علشان يقعدو فى البيت , ومش عاوز اقول انه مجموعة منهم كانت بتفكر زى شخصية امينة - فى ثلاثية نجيب محفوظ -الملخص انه فعلا فيه بنات كتير مش شايفة مشكلة فى الوضع , ودى مشكلة فى حد ذاتها
فدلوقتى مش المهم ان الرجالة تعرف انى دى حقوق السيدات , لكن الاهم ان السيدات نفسهم هما , اللى يقتنعو الاول ان دى حقوقهم , وبرضه مش كل الستات مش واخدين حقهم , فيه ناس واخة حقها تالت ومتلت زى مابيقولو
زى ماقلت ان التغيير فى الجيل الكبير امله ضعيف جدا , الاهم ان الجيل الجديد يبقى فاهم وعارف حقوقه ومايفرطش فيها – سواء حقوق مدنية او اجتماعية او سياسية – لان اللى بيفرط فى حق بيفرط فى كل الحقوق

مش كلنا مرسى
كلنا قرينا المحاكمة اللى ابيتاف عاملها انا احب اقول ان مش كلنا مرسى , مش كل الرجالة – انا مانكرش انه فيه نسبة زى مرسى , بس فيه نسبة كبيرة بتدافع عن حقوق ليلى , يمكن زى ليلى نفسها
مش كلنا مرسى , ومش كل مرسى وحش
فيه تصرفات كتيرة الراجل بيتعامل على انها حقه مع انها مش حقه
هايقولو تقعد فى البيت الا اذا كان فيه سبب للعمل , وفيه سبب اكبر من الحالة الاقتصادية اللى بتقول ان مرتب شخص واحد لا يستطيع فتح بيت
مش كلنا مرسى , وانا بقول نيابة عن مرسى وماشابه انه فعلا مجتمعنا ذكورى , قايم على سلطة الرجل وحقوقه

وان شاء الله لما ارتب الافكار هااعمل تحديث للموضوع , وللحديث بقية
وفى الاخر , عفوا مش كلنا مرسى , ايضا مش كلكن ليلى


جيت

اهلا بكم
انا كنت مختفى الفترة اللى فاتت , وعلى الاغلب فترات غيابى هتبدأ تكتر , بس مش هيبقى اكتر من كام يوم ان شاء الله
انا فعلا كنت حاسس بحالة غريبة وانا بعيدة
المرادى ,انا قلت بلاش موضوع , اغير شكل المدونة يمكن افوق شوية ,
وقولت اكتب حبة كلام زيادة فى البروفايل بتاعى , يمكن حد يحب يبص عليه , وزودت كام لينك لمدونات بقيت من متابعينها على طول

سيبنا من الرغى , ان شاء الله هانزل موضوع جديد النهاردة
مستنيكم , تعالو زورونا

SWAY ||

اسف على التأخير عن كتابت اى بوست جديد
انا فى دماغىموضوع , بس مش هوة اللى هااكتبة المرادى

المرادى هااتكلم عن
SWAY اغنية dean martin
بطابيط هانم سبقتى وعملتها بوست , بس فيه ناس سواء عارفين الاغنية او مش عارفينها كانو طالبين لينك ليها
وانا عملتلها ابولوود وده اللينك للى عاوز يعملها داونلوود
وعموما , انا مش عارف ايه اللى ممكن يتقال ,غير ادى لينك الاغنية
وادى الكلمات

Sway


When marimba rhythms start to play
Dance with me, make me sway
Like a
lazy ocean hugs the shore
Hold me close, sway me more

Like a flower
bending in the breeze
Bend with me, sway with ease
When we dance you have
a way with me
Stay with me, sway with me

Other dancers may be on the
floor
Dear, but my eyes will see only you
Only you have the magic
technique
When we sway I go weak

I can hear the sounds of
violins
Long before it begins
Make me thrill as only you know how
Sway
me smooth, sway me now

Other dancers may be on the floor
Dear, but my
eyes will see only you
Only you have the magic technique
When we sway I go
weak

I can hear the sounds of violins
Long before it begins
Make me
thrill as only you know how
Sway me smooth, sway me now
You know
how
Sway me smooth, sway me now