شبابيك على الحياة

من اجل رؤية ما يدور حولنا , لننظر من الشبابيك

مش كلنا مرسى



مش كلنا مرسى

طبعا كلنا شفنا الحملة – لو التسمية صحيحة – اللى موجودة على المدونات النهاردة تحت اسم كلنا ليلى
انا فى الاول ماكنتش متخيل انها حملة او صرخة زى مابحب اسميها , اول ماشفتها كانت عند بطابيط
فكتبت رد عن الموضوع , وبعد كده لقيته عند ابيتاف , بنت مصرية , لست ادرى ,.... وغيرها
قلت انا مش هااقعد اكتب رد فى كل الاماكن دى , ففكرت انى اعمل موضوع اكتب فيه الردود بتاعتى – بعد تصيحي الغلطات الاملائية ان امكن
وفى نفس الوقت احاول اقول رأى عن الموضوع , بس لما قريت موضوع ابيتاف لقيت عنوان الرد بتاعى

عفوا مش كلنا مرسى , زى ماهو ليس كلكن ليلى

المجتمع المصرى خصوصا والعربى عموما مجتمع ذكورى قايم على ان الرجل هو مركز السطة , وهو اللى بايديه يدى الحقوق او يمنعها –زى رئيس الجمهورية كده- لانه قايم على الثقافة البدوية – اللى هية اساس الثقافة العربية عموما – فكان الرجل هو مصدر كل شىء-باعتباره من يحارب ويعمل
الكلام ده لما انتشر وبالذات فى مصر , فى الاول ماكنش فيه مشكلة لان الحياة الزراعية والريفية كانت تقريبا نفس الحاجة
بس نيجى لدلوقتى , الموضوع اتغير وماعادش الراجل هو كل حاجة
نبص دلوقتى هانلاقى عائلات كتيرة ماعدش فيها الكلام اللى اتقال ده , عاد فيه حرية اكتر للبنت , منع اكتر للولد- منع بالنسبة للحرية اللى كانت معاه
ومش معنى ان فيه حاجات غلط الولد بيعملها يبقى البنت كمان لازم تعملها , بالعكس لازم تتمنع عن الولد
مش معنى انه يساء استخدام الحرية يبقى الحرية وحشة , الشباب وبالذات الولاد بيستخدمو الحرية باسوأ طريقة ممكنة - شوف الموضوع بتاع بطابيط
طب ده الموجود , ايه الحل
الحل فى المشاكل دى عمره ماهيبقى بين يوم وليلة , بالعكس هايحتاج فترة طويلة
وبرضه عمره ماهيبقى بقرارا او قانون من فوق , لان ده تغيير فى عادات المجتمع , يبقى لام يبقى من قاعدة الهرم مننا احنا , الجيل اللى موجود دلوقتى – بالذلت البنات – قدر ياخد حقوق كتير – حق مكتسب يستحقه –
فالمفروض يحافظ على الحقوق دى ومايستغلهاش غلط ويحاول ياخد حقوق اكتر
وبكده ممكن نقول انه فى المستقبل القريب نقدر نوصل فعلا لمرحلة المسئولية والمساواة الفعلية
بس الاهم من اخد الحق , انك بعد ماتاخده تثبت انك تستحقه فعلا وتحافظ عليه
ومانستغلش الحرية بصورة غلط زى مابيحصل من الشباب و بالذات الولاد زى ماهو مكتوب فى الموضوع

-----------------------------------
وفى تفس الوقت , مش لازم نعمم الكلام ده , لانه بناءا على تجارب شخصية , مش كل البنات ليلى كذا مرة قدامى ببقى بحضر تدريبات او ندوات ويجى الكلام عن حقوق المرأة تلاقى اول المعترضين هما من السيدات و الأنسات, وانا وزمايلى بنحاول نناقشهم ونثبتلهم ان ده حقهم وهما ابدا و مقتنعين اننا بنحاول نفسد دماغهم وندخل افكار غربية علشان نفسد الناس
من فترة كنت فى تدريب لمجموعة من الطالبات وفى المناقشة فى وسط التدريب كانو كلهم مقتنعين انهم مش محتاجين حاجة , نسبة منهم كانت مش مقتنعة بالمواضيع اللى بنتكلم عنها , وكان ضمن التدريب استطلاع رأى للطالبات نتيجته ان نسبة معقولة منهم كانو بيفكرو فى انهم عاوزين يتجوزو علشان يقعدو فى البيت , ومش عاوز اقول انه مجموعة منهم كانت بتفكر زى شخصية امينة - فى ثلاثية نجيب محفوظ -الملخص انه فعلا فيه بنات كتير مش شايفة مشكلة فى الوضع , ودى مشكلة فى حد ذاتها
فدلوقتى مش المهم ان الرجالة تعرف انى دى حقوق السيدات , لكن الاهم ان السيدات نفسهم هما , اللى يقتنعو الاول ان دى حقوقهم , وبرضه مش كل الستات مش واخدين حقهم , فيه ناس واخة حقها تالت ومتلت زى مابيقولو
زى ماقلت ان التغيير فى الجيل الكبير امله ضعيف جدا , الاهم ان الجيل الجديد يبقى فاهم وعارف حقوقه ومايفرطش فيها – سواء حقوق مدنية او اجتماعية او سياسية – لان اللى بيفرط فى حق بيفرط فى كل الحقوق

مش كلنا مرسى
كلنا قرينا المحاكمة اللى ابيتاف عاملها انا احب اقول ان مش كلنا مرسى , مش كل الرجالة – انا مانكرش انه فيه نسبة زى مرسى , بس فيه نسبة كبيرة بتدافع عن حقوق ليلى , يمكن زى ليلى نفسها
مش كلنا مرسى , ومش كل مرسى وحش
فيه تصرفات كتيرة الراجل بيتعامل على انها حقه مع انها مش حقه
هايقولو تقعد فى البيت الا اذا كان فيه سبب للعمل , وفيه سبب اكبر من الحالة الاقتصادية اللى بتقول ان مرتب شخص واحد لا يستطيع فتح بيت
مش كلنا مرسى , وانا بقول نيابة عن مرسى وماشابه انه فعلا مجتمعنا ذكورى , قايم على سلطة الرجل وحقوقه

وان شاء الله لما ارتب الافكار هااعمل تحديث للموضوع , وللحديث بقية
وفى الاخر , عفوا مش كلنا مرسى , ايضا مش كلكن ليلى


7 comments:

arabesque said...

طبعا مش كلكم مرسي أنا واثقة من ده بس هو الجديد أن فعلا عندك حق مش كلنا ليلى:)

جايز كنا نقصد ب"كلنا" بالذات المشاركات على المدونات في يوم ليلى - على فكرة التسمية الصحيحة اللي بدأت بيننا كانت "يوم" مش "حملة"ا

معاك كمان إن مفيش تغيير بين يوم و ليلة، الفكرة هي تحريك المياه الراكدة عشان نبتدي نغير من نفسنا لأنها البداية الحقيقية لتغيير اللي بيحصل حوالينا
بوست جميل و تفاعل مشكور

September 10, 2006 10:19 AM  
MAKSOFA said...

أتفق تماما مع وجه نظرك التي لخصتها في هذا لبوست

September 10, 2006 2:35 PM  
Anonymous said...

انا كمان معاك في وجهة نظرك

September 10, 2006 4:50 PM  
Ensan said...

arabesque
انا عن نفسى بحب تسميتها صرخة علشان الناس تفوق

MAKSOFA & bosbos
فيه رجالة وشباب كتير متفقين فى وجهة النظر دى , ومتفقين انه فيه مشكلة بس محدش عارف يحط الحل
يمكن ده يكون اول الطريق

September 11, 2006 4:59 AM  

اول مرة ادخل على مدونة حد رادد علينا واحس انه بيتكلم بمنطق بجد موافقاك في كل كلمة جزء من مشكلة البنات بنات وستات تانية ومش كل الرجال زي مرسي او زي حنفي .. شكرا على تفهمك وانك ما هاجمتش لمجرد الهجوم زي ما ناس كتير عملت

September 11, 2006 8:58 AM  
Unknown said...

شوف الناس الكُمل ... شوف العقل .. شوف المفهومية ... الله ينور عليك .. يا ابو الشبابيك

September 11, 2006 11:25 AM  
Ensan said...

LAMIA
زى ماقلت انا من المقتنعين ان فيه مشكلة , وكلنا بنحاول نشوف لها حلول

September 11, 2006 9:35 PM