شبابيك على الحياة

ياترى مين هيكسب ؟؟ جمهور الاهلى ولا حمهور الزمالك ؟؟

جمهور الاهلي شتم لاعب الزمالك اللي بيلعب باسم مصر.. رد جمهور الزمالك وشتم لاعب الأهلي اللي لابس فانلة منتخب مصر ..

أو العكس .. جمهور الزمالك شتم لاعب الاهلي ردت جماهير الاهلي وشتمت لاعب الزمالك وكلهم بيلعبوا باسم مصر ..

ياحلاوتكم .. ياجمالكم .. ياخيبتكم التقيلة ياجماهير مصر ..

تصدقوا بالله .. لو جماهير الاهلي والزمالك شجعوا الفريق اللي بيلعب ضد مصر .. يبقى أحسن وأفضل وأكرم لينا مليون مرة اننا نشتم لاعب بيلعب باسم مصر ..

هيطلع واحد فصيح ويقول جمهور الزمالك هو اللي شتم الأول ..
ويرد واحد تاني فيلسوف ويقول : جمهور الاهلي هو اللي شتم الأول ..

ومش هنخلص بقى من الفصيح ومن الفيلسوف ..

طب إيه رأيكم أنا عندي اقتراح .. ونشوف مين فيكم اللي هيكسب ..

*** انتوا ياأهلوية بتقولوا ان الاهلي نادي القيم والمبادئ وان جمهور الاهلي بيحب الاهلي لأنه نادي القيم والمبادئ .. نفهم من كده أنكم جمهور بيعشق القيم والمبادئ .. وانكم أحسن جمهور ..


*** وانتوا يازملكوية بتقولوا إن الاهلوية بيدعوا انهم نادي القيم والمبادئ .. وإن دا مش صحيح .. وبتقولوا : إن جمهور الزمالك من الطبقة العيليوي .. من الطبقة الراقية يعني .. وإنكم متعلمين ومثقفين ..

طب يافصيح انت والفيلسوف .. هو برضه معقول : لو واحد حرامي سرقني أروح أنا كمان أسرق وابقى حرامي زيه ؟

شوف يافصيح انت والأخ الفيلسوف .. انت لا طلعت فصيح ولا طلعت عندك قيم ومبادئ ولا حاجة خالص.. وهو لاطلع فيلسوف ولا من الطبقة العيليوي ولا مثقف ..ولا نيلة .....

وانتوا الاتنين خيبتكم خيبة جرة خيبة ساحبة خيبة وراها خيبة ... والله يخيب الخايب أكتر ماهو خايب ..

شوف يافصيح انت والفيلسوف .. حاجة من اتنين ..

** ياإما انتوا الاتنين تشجعوا الفريق اللي بيلعب ضد مصر ..

** ياإما تشجعوا منتخب مصر ...

استنى يافيلسوف أفندي .. انت والبيه الفصيح .. عارف انتوا هتقولوا إيه ؟

شوفوا يارجالة .. لو جمهور الزمالك شتم لاعب من الاهلي اللي بيلعب باسم مصر ... لازم جمهور الاهلي يرد عليه .. دا حقه ودا واجب عليه .. محدش يقدر يقول حاجة في الحق .. بس بشرط

يرد جمهور الاهلي علشان يثبت انه جمهور القيم والمبادئ .. ويشجع اللاعب اللي يتشتم ..

يعني لو جمهور الزمالك مثلا شتم أبو تريكة .. يرد جمهور الاهلي ويشجع أبو تريكة بأعلى صوت .. وبأقوى هتاف .. علشان يرجع له ثقته في نفسه .. ويرد له اعتباره .. ويقول لأبو تريكة احنا كلنا معاك .. واحنا الكبار ..

ونفس الشيئ .. لو جمهور الاهلي شتم لاعب من الزمالك اللي بيلعب باسم مصر .. يرد جمهور الزمالك ويشجع لاعب الزمالك بدون مايشتم أي لاعب من الاهلي ..

وبكده يثبت جمهور الزمالك انهم فعلا من الطبقة الراقية .. وانهم محترمين ومثقفين ..

ساعتها .. العالم كله هيحترمنا ويقول ان فيه في مصر ناس محترمين ..

ساعتها .. حتى لو خسرت مصر المباراة في الملعب .. هيكون الجمهور كسب المباراة في المدرجات ..

ياترى مين اللي هيكسب ؟

جمهور الاهلي ؟ ولا جمهور الزمالك ؟

أتمنى يكون جمهور مصر كله يكون هو اللي كسبان ..