شبابيك على الحياة

ولما الجرايد و المواقع تنقل الموضوع من المدونات لصفحات تانية

و اماكن تانية بصورة تخلى ان المناقشة كانت محصورة فى همجية الشباب

و توحش المنطقة و قصور الامن , ده غير ان الموضوع تحول الى هجوم على الخليجين فى مصر باعتبار ان الفتاتين اللى كانو مرتدين عباءات خليجية هما خليجيات - ماهو نص المصريات اللى مجودين فى اجازات من شغلهم فى الخليج بيلبسو عبايات خليجى ,و اللى رمى المسئوليى على البنات و انهم بيلبسو ملابس غير لائقة – مع الاخذ فى الاعتبار ان المحجبات بيتعاكسو برضه و ممكن يكون بنسبة اكبر- و عمر الموضوع ماكان لبس علشان نحكم بدليل فترة الستينات والسبعينات فى مصر بلاش اقول اوروبا او امريكا لتقولولى دول كفرة مالهومش دين

وصاحب الرأى ده مش عارف اقول ايه , مش عارف جاب رأيه ده منين

طب سيبنا من الكلام ده

طب ليه مانتكلمش عن الموضوع كمشكلة
اولا كان فيه مشكلة قلة عدد افراد الامن , بيقولك ان العيد فى كل الاماكن و من الصعب انه ينشر افراد امن فى كل مكان , طب احنا بنتكلم عن وسط البلد , و زى ماالناس قالت الكلام ده بيتكرر كل سنة , يعنى ماكنش ينفع توقف بوكس او بوكسين من اللى كانو مرصصين مع عربيات الامن المركزى قادام كل الجامعات و الكليات اليومين اللى فاتو علشاان اتحاد الطلبة , ولا حتى لو كان عسكرى واحد فك الهايش بتاعه وضرب فىالهوا ماكانش هيهدى الناس و لا بس فى المظاهرات بتنضرب بالشوم و يطلع القنابل و الرصاص المطاطى و فى الحالة دى مفيش

ثانيا : الشباب , وده فى اعتقادى هوة المشكلة الاكبر بغض النظر عن السبب ( وده كتير و الحمد لله ) سواء كانت بسبب الفقر اوالبطالة اوتأخر سن الزواج او حتى بسبب هيفاء وهبى واخواتها و و ميلودى و اخواتها , بس الاكيد انه بقى عند الشباب ثقافة عنف موجهة ناحية الهدم مش ناحية الاصلاح

وبقى فيه حالة من اللامبالاة وعدم احترام الآخر , و مش عارف اقول ايه , حالة من تبلد المشاعر


نقول ايه السبب , , ممكن كل الكلام اللى اتقال ده صح , ممكن مايكونش فيه حاجة وانها كانت زحمة حوالين الممثلين و ان التذاكر خلصت , بس ايه اللى خلى الموضوع يقلب فجأة من فسحة عيد لحلات تهجم – و طالما اكتر من واحد اتفق انه كان فيه حالات تهجم يبقى اكيد كاان فيه , مش هنستهبل ونقول مفيش
والحاجات دى بتحصل كل يوم وفى كل حتة فى مصر , ممكن مش بالحجم ده , بس سكوتنا على الصغير مايخليناش نستغرب لما نشوف الكبير

نرجع ونقول ان المشكلة مش فى اللى حصل , المشكلة انه هايحصل تانى وتالت , المشكلة ان محدش بيتعلم
ياريت نسمع كلام بجد , مش من عينة واحد قريت رأيه بيقول فيه " وده اثبات ان الحجاب مش حل "
مين اللى قال المشكلة فى الحجاب او اللبس
المشكلة فى حجاب الروح مش حجاب الرأس , ياريت نتعلم , عمر ماكان اى دين بيقول كده
كل الاديان بتركز على ان التربية والاخلاق هما الطريق الاول للنجاة

ارجع واكررها , التربية , و الاخلاق

رسائل قصيرة

اصحاب المحلات : مااقدرش اقول غير شكرا
وسائل الاعلام : عرفنا اللى حصل , وبعدين
الهمج : اتفوووووووووووووووووووووووه