شبابيك على الحياة

زمان لما كنت فى المدرسة – بالذات ابتدائي واعدادى - كنا بنقف فى طابور الصباح ونسمع الإذاعة المدرسية
وبعد كده بنهتف باعلى عزمنا – كان الواحد عروقة بتبان – تحيا جمهورية مصر العربية
وبعد كده بنقول النشيد الوطنى
بلادى بلادى بلادى
لكى حبى وفؤادى

النشيد نفسه مش موضوعنا انه كلماته ركيكة او عادية ومكررة

انا بتكلم عن معناه , كان الواحد بيقول النشيد اكنه اهم حاجة فى الدنيا , كان بيعلى صوته , مش مهم يكون صوته وحش او نشاز بس المهم انه يعلى صوته , انه صوته يكون اكتر واحد واضح بين زمايله
كان بيحس بالفخر لما الأستاذ يقوله برافو قلت النشيد حلو

النشيد بالنسبة ليا كان الوطن , كان البلد

كان الواحد بيحب بلده فكان بيعبر عن كده بالطريقة الوحيدة اللي كان يعرفها , انه يقول النشيد بصوت عالى

وكبرنا وكبرت احلامنا وكبرت الأمانى فى قلوبنا
معنى حب البلد اتحط فيه اول شرخ وانت داخل ثانوية عامة , لما لقيت ابوك كل شهر يديك مبلغ وقدره ويقولك جه علشان دروسك
لما لقيته بياخد نبطشيات فى الشغل علشان يجيب فلوس مادة
لما دخلت الفصل ومالقيتش لا مدرس بيشرح – الا مجموعة اشهدلهم بالامانة فى الشرح و كانو فعلا بيشرحو احسن من الدروس بشهادة زمايل كانو بياخدو عندهم
وعلشان مايبقاش واحد يقول انه كان بيعمل كده علشان يجيب طلبة جديدة اقوله ان الطلبة كلهم بيبدأو الدروس قبل الدراسة بشهر على الاقل
غير دول كان المدرس مابيدخلش الحصة اصلا – وهنا الشرخ كان بيزيد فى حب الوطن
وطن ايه ده اللى بيقولى مجانية تعليم و ابويا بيدفع دم قلبة فى الدروس الخصوصية

نرجع خطوتين ورا , فى اولى ثانوى بتكون لسة داخل جديد و لسة فيك كلام وأحلام اعداى , بتكون الناس الوحيدة اللى بتقول النشيد وتحية العلم بذمة وضمير , وتبص تلاقى بتوع تانية بيقولو بكسل , اما تالتة ثنوى مابيفتحوش بقهم

مصر يا ام البلاد انت غايتى والمراد

وانت فى اولى ثانوى بتقول فى بالك هما مابيقولوش النشيد ليه , هما مابيحبوش مصر
فى الترم التانى تقول اشمعنى انا اللى هااقول النشيد سيبك ياعم

لما توصل تالت هاتقعد تضحك وتغمز للى جمبك لما لاقى بتوع اولى بيقولو النشيد باعلى عزمهم

لما تخلص تالتة وتيجى تقدم مكتب التنسيق بيكون الشرخ زاد فى المعانى اللى عندك
بتلاقى مجاميع خرافية ومابتلاقيش كليات
ولو لقيت الكلية مابتلاقيش تعليم , وترجع تانى للدروس
وهنا بيكون الشرخ اتمكن وطوق المعنى كله

زمان لما الواحد كان بيروح مسرح كان لما النشيد يبدأ يتعزف تلاقى كله قام وقف على رجل

لكن الايام دى النشيد بيتعزف وكل واحد بيبص على اللى جمبه هايقوم يقف ولا لا او قاعد يقزقز لب
لغاية مايجى المخرج او اى حد يقعد يزعق علشان تقف اخر كوبليه من النشيد وتلحق تقعد قبل ماحد ياخد باله انك وقفت للنشيد



وعلى كل العباد

كم لنيلك من ايادى